【口罩護膚】急救戴口罩的皮膚問題!附護理唇瘡/暗瘡產品推薦
【口罩護膚】急救戴口罩的皮膚問題!附護理唇瘡/暗瘡產品推薦
Natalie Chu 發佈時間: 2020.03.18

呢排日日都要戴口罩,有時仲要戴十幾個鐘,真係焗到皮膚超差。戴口罩剩係化眼妝好喇,搽埋粉底皮膚真係會頂唔住會勁爆瘡!

戴得口罩多皮膚即時出現問題,真係樣衰到美顏相機都攪唔掂(原圖自己都睇唔過眼,所以美肌咗)

第一個問題係出暗瘡,第二個係出唇瘡,真係「瘡瘡」大爆發!千祈唔好擠暗瘡,因為好容易有凹凸洞,有咗凹凸洞真係好難先消滅到佢,千萬唔好擠。

暗瘡一向都有出開,所以長期都有呢兩支日本嘅暗瘡膏Epul Acne Cream W & PAIR Acne Cream W,日本嘅暗瘡膏有樣好就係唔會「乸」,同埋搽係啲「石頭瘡」度好快消腫!啱晒而家戴口罩,成日焗到勁多瘡,真係要帶係身得閒就搽。

另外有一隻係可以夜用嘅暗瘡貼,又係日本買,ACNES LABO暗瘡膏Spots Cream搽完再貼暗瘡貼Acne Patch,用咗第日消咗紅,唔會令到暗瘡再惡化!真係唔想再爛面落去 (⁎˃ᆺ˂) 暗瘡膏Spots Cream朝早用,日夜夾攻!

↑ 圖片嚟自ACNES LABO網站

唇瘡係傳染性嘅疱疹一型病毒,真係要即時解決佢先得,唔係好容易惹到周圍,所以一定要用藥用唇膏,因為剩係搽藥膏個咀會好乾好唔舒服,搽其他潤唇膏我試過令到唇瘡惡化,所以呢兩隻唇膏係我冬天必備。

以前一到冬天我就會生唇瘡,自從認識咗SHISEIDO藥用潤唇膏搽咗無咁易生唇瘡,而家我一年四季都有用。

Blistex Medicated Lip Ointment 係我用過最好嘅治療唇瘡嘅產品,平時用藥膏攪到個咀勁乾,用佢可以搽埋成個咀,仲可以預防其他位唔再出唇瘡,搽幾次已經消腫消炎,唔會好似其他藥膏咁又爛晒個咀又紅又腫,真心推介俾有唇瘡困擾嘅人。超好用我之前仲介紹過俾超多人用。有次生唇瘡揾咗好耐都無得買,真係超驚佢唔再出,原來而家要有藥劑師嘅屈人寺或者萬0先有,嚇得我以為無得買。

日常護理都要加強保濕,戴口罩之後用太滋潤嘅產品會令到毛孔容易阻塞,敷吓蘆薈GEL可以消炎修復傷口,爛面勁啱用。透明質酸嘅產品都好啱保濕用,人體自然生成嘅天然物質,保濕力極強嘅天然成分,鎖水功效都好強,保濕做得好皮膚無咁易出油毛孔都無咁易阻塞。

希望大家抗疫期間身體健康,記得勤洗手,戴口罩,保持清潔,大家一齊抗疫,加油香港人٩(๑❛ᴗ❛๑)۶

睇盡最新美妝時尚情報及女生話題!
關於 Natalie Chu 彩妝 | 護膚 Blog:  Natalie Chu 的 U Blog 網誌
對扮靚好有興趣,有考ITEC又唔做美容師,有學化妝又唔做化妝師!希望興趣可以發展成為事業,鍾意旅行、護膚、化妝,分享生活。
誠徵專欄作者 如希望成為U Beauty專欄作者,請將個人照片30-50字簡介,連同個人博客/社交平台連結電郵至 column@ulifestyle.com.hk,我們將與您聯絡。

集結熱門女生主題
U Beauty
《女生扮靚懶人包》
貼心資訊 All in One! 立即用