全港最大《蠟筆小新》樂園!巨型小新任影!
發佈時間: 2012.11.20

小新:「你返黎拿?」

美冴:「你應該話"我返黎喇"!」

《蠟筆小新》嘅粉絲一定會記得呢段小新同媽媽嘅經典對白,小新放學返屋企,總係將「我返黎喇」講錯成「你返黎拿」。原來佢已經講錯左成20年喇!小新過往20年用超過800集動畫儲落唔同年齡層嘅粉絲,為慶祝動畫踏入20週年,小新今個聖誕由日本飛左黎香港同大家見面。將軍澳中心的平台變身成3000呎、全港最大嘅小新主題「冬日白雪小鎮」。身為小新Hard core的筆者梗係即刻衝過去睇清楚每一個角落啦!

成個「冬日白雪小鎮」都係仿照小新家鄉 - 春日部市建造出黎,可以見到平時卡通裡面嘅熟悉場景:春日部公園滑梯、小新曾經去過嘅拉麵店、風呂澡堂、家犬小白嘅靚屋等,好有誠意。一眼望落去已經叫人即刻拎起相機狂拍,原來小鎮裡面仲有一間屋,裡面有好齊全嘅小新檔案:極大量小新產品珍藏、人物介紹、過往20年嘅電影海報,甚至漫畫原稿,而且係完全免費入場,加上「三米高小新巨型彈床」,粉絲們有理由唔去嗎?



未入到將軍澳中心,已經feel到小新味濃!

 


小新產品珍藏:日版、韓版、港版、世界各地嘅精品書藉都有!

 


冬日白雪小鎮


「春日部防衛隊」嘅成員小新、正男、阿呆、風間、妮妮,一齊黎晒!


妹妹小葵同埋奶奶去食拉麵喲。



小新:嗨~你要的「麵拉」。

 


阿呆:天氣凍...食雪糕...正...


小新最佳豬朋好友:不理不理左衛門,哈哈...


繞到後面就會見到小新一家沖涼嘅「天倫樂」了!呢個範圍其實係「動畫放題區」,右邊風間和妮妮上面有一個小螢幕,會不斷播放小新動畫,又有漫畫書借俾大家坐喺度睇。


好想拎呢張台返屋企...


睇完出面,係時候入去「小新之家」資料館喇!


好多新舊小新珍藏,上面個架嘅係2011年電影「黃金間碟」嘅精品,只限日本上映期間發售。

 


呢堆公仔,筆者都有幾個喺屋企...


右上角嘅漫畫有日版同韓版,韓版《蠟筆小新》Logo好少見喲。


點解小新仲可以5歲,5足20年...


坐底同小新一齊食Shabu-Shabu同影相啦!


小新由20年前起每年都有一部電影,香港無上足,但粉絲肯定睇過!(PPX同埋土X網)


小新是怎樣畫成的?睇下原稿你就知道,仲可能學到點畫小新!

 

佔地3000呎嘅冬日白雪小鎮,由11月24號起開始俾大家盡情參觀,除左參觀之外仲有小新POP-UP STORE,據講會售賣過百款小新精品,香港、台灣未見過嘅精品都有!記得帶埋彈藥去玩喇!

 

以上仲未係成個主題樂園嘅內容,商場公關話,月尾正式開放時,仲會有3米高嘅巨型小新彈床,野原一家仲會親身出黎同大家影相!

 

將軍澳中心之外,其實荃灣荃錦中心、新領域廣場同埋屯門卓爾廣場、錦薈坊一共5個商場都有主題樂園,以將軍澳中心為最大,5個樂園加埋總共6000呎,人物各有唔同造型,真係可能要花成個聖誕嘅時間先睇得晒!

 


小葵同小白:你地11月24號會唔會黎探我呀?(設計對白,小葵與小白唔識講野)

撰文/圖:nith

最高瀏覽