正在閱讀
Kay大讚張繼聰高招氹老婆!森美冒汗:提高晒男人standard

Kay大讚張繼聰高招氹老婆!森美冒汗:提高晒男人standard

發佈時間: 2018.06.19

前兩日電台節目《公子會》,謝安琪上嚟做嘉賓,大講張繼聰甜蜜事!「佢(老公)識我個陣,係箍牙最醜時......」佢繼續讚:「我箍緊牙,佢無端端追我,真愛嚟架!」聽完,森美讚張繼聰有慧眼,識得投資!

講到藉著講甜言蜜語,慢慢成為每日習慣,氹另一半開心,兩個人相處就會快樂,森美自認衰口,知自己要改。返到屋企見到森美嫂,問自己有冇肥到。森美竟然咁答,真係唔多識做:「你運動得少,跑兩步又嗌停,你點會瘦到呢。」連謝安琪都認唔住話:「咩事啊你其實。」

雖然森美解畫話自己對運動好認真。但一講到之前叫老婆拎住計數機,計計卡路里。又做錯晒啊!森美嫂當然黑晒面,仲即刻走咗去啦! Kay聽到都覺得煩,鬧佢:「好煩啊你,呢啲人。」唉,係女仔都明白,老婆只係想人氹佢開心,講真心說話只會火上加油!

謝安琪繼續踩:「你估佢而家需要一個pt(私人教練)咩...」森美認衰口,所以以前同老婆相處都唔太開心。而家睇穿夫妻「語言藝術之道」,會改口應老婆:「冇所謂啦,你肥啲啲。冇所謂啦!」(但呢句...好似都唔係標準答法喎!)

謝安琪睇唔過眼,分享張繼聰有幾識做,畀森美跟住學下野!Kay問老公:「呢排我有冇瘦咗?」佢即刻答:「咦!你企喺邊度啊?瘦到見唔到你!」森美聽完就話呢啲要出於愛,度晒gag!

Kay愈講愈開心,仲話老公好多戲仔,平時行過佢身邊,都會扮「跣親」,講句「嘩!好滑啊~~」讚老婆皮膚夠晒滑!真係識做啊,唔怪得氹得Kay咁開心!

森美聽完,話想請張繼聰上節目,演繹如何氹另一半開心。連Kay都話想聽!隨即又發覺唔多對路:「唔可以畀佢啲嘢「跣」出嚟,提高晒男人standard!唔係就要做多好多嘢!」

 

資料來源:公子會

圖片來源:IG@louischeung2013, IG@sammy903, my903s, tvb

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠

更多女生話題