卓韻芝的衣櫥

發佈時間: 2012.12.13

一幅自拍照，令卓韻芝這幾天又成為網民的話題。事實上，阿芝的穿衣風格一向有自己一套，今日就由她公開自己的穿衣美學。

一張自拍照，令阿芝又再成為討論區的話題。

Q：幾時開始有自我形象的意識？
A：11、12 歲那年暑假我無端端發咗癲，覺得要跟冰場的蒲友一樣。我有 York 牛仔褲，也會偷穿媽媽的 Fiorucci 牛仔褲，襯 icefire 衛衣和魚籮型 LV，在冰場蒲。當時心態絕對是模仿別人，來自恐懼，驚人覺得自己不夠潮，想得到別人認同。

Q：據聞商台時代的你，經歷過長期騷長腿、超級高跟鞋但唔 set 頭唔化妝的年代。
A：對，那時我是不喜歡著衫的，衣服愈少布愈好，亦絲毫不在意別人的睇法，所以個頭先至癲雞咁。到了 20 歲某段時間，我變成一個瘋狂 shopaholic，因為幸運得到高薪厚職，可以無聊行入 joyce 就買幾萬元衣服。未幾，問題出現了：買到又如何？漸漸又回到不顧身世的階段。大約 5 年前，慢慢發現化妝原來是有趣的，像畫畫。然後又發覺當日常衣著襯得有趣，自己真的會開心一點，朋友見到你又會開心。後來倫敦的日子令我迷上 vintage，那邊是 vintage 同 antique 的天堂，雖然物價是嚴重地貴。

Q：如何形容目前的 style？有什麼穿衣法則？
A：可能是 with story 吧。透過衣服，將一些故事放在身上，是一件有趣的事。既然每天都要著衫，若將一些從來唔關事的元素放在一起，己經是一種啟發，會 inspire 到自己去做很多事情。最重要是體會著衫的趣味，就算襯錯衫都是有趣的。

Q：時下潮流，有沒有哪些令你覺得很核突？
A：我只覺得單純追潮流，將流行的東西躂晒上身就會好核突。人著衫，著錯衫就冇事，因為都係人著衫，衫著人，就係一個真正的問題。